منتديات رامي و أصدقاء جوستن تي في
عفوآ أنت لم تسجل بعد في المنتدي وستكون بعض الاقسام محجوبه عنك
يمكنك الآن التسجيل لن تستغرق بضعه ثوان وستصبح عضوآ معنا لتتمتع بكل أمكانيات المنتدي وكذلك إضافه المواضيع

منتديات رامي و أصدقاء جوستن تي في

المنتدي الرسمي لمشجعي رانيا نجيب الجزار ستار اكاديمي صور - فيديو - محمد علي المغربي ستار اكاديمي-محمود شكري ستار اكاديمي 7 -صور-اغاني-معلومات-شات-مسابقات-موسيقي-افلام عربيه -أفلام اجنبي-مسرحيات-برامج-المنتدي الرسمي ستار اكاديمي 8
 
الرئيسيةالبوابهس .و .جالتسجيلدخول
::::الآن وحصريآ بالمنتدي ::: بقاعه سينما رامي ::: يمكنكم مشاهدة و تحميل :: فيلم أذاعة حب : بطولة : منه شلبي :: فيلم :: الفيل في المنديل بطولة : طلعت زكريا :: فيلم سامي اكسيد ال كربون بطولة : هاني رمزي ودره :: فيلم المركب بطولة : يسرا اللوزي و رامز امير ::  فيلم الفاجومي  بطولة :صلاح عبد الله والهام شاهين و خالد الصاوي :: فيلم صرخة نمله بطولة : عمرو عبد الجليل و رانيا يوسف مع بداية عرضه بدور السينما

شاطر | 
 

 يوميات المواطن حنفي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: يوميات المواطن حنفي   الخميس 5 فبراير 2009 - 12:04


يوميات المواطن حنفي

فى البيت

(حنفى نازل الشغل الصبح بدرى )

الزوجة : انت نازل الشغل ياحنفى ؟
حنفى : لا نازل ألعب كوره ياولية بطلى الاسئلة المتخلفة دى
الزوجة : طب بس براحة عليا شوية ده احنا لسة على الصبح يعنى
حنفى : هو انتى اللى شافك يبقى شاف صبح مش عارف أنا كل يوم الواحد يصطبح بالخلقة دى
الزوجة :استغفر الله العظيم يارب ايه ياراجل انت هو انت راكبك عفريت ولا ايه؟
حنفى : وهو برضه فى عفريت يطيق يقعد فى شقة انتى قاعدة فيها؟
الزوجة : طيب ياسيدى أنا مش هرد عليك هات مصروف الشهر عشان أنا نازلة السوق كمان شوية
حنفى : ليه ؟ هو النهاردة كام فى الشهر؟
الزوجة :النهاردة أول يوم فى الشهر ياحنفى و مافيش ولا مليم فى البيت
حنفى : ياولية هو انتى منبه بيضرب أول كل شهر ؟ مافيش مرة كده تحصل معجزة وتنسى موضوع المصروف ده؟
الزوجة : قصر ياحنفى وهات الفلوس عشان اشوف اللى ورايا
حنفى : والله ياختى مهمة أوى سيادتك والحاجات اللى وراكى مقطعة بعضها ومش لاقية وقت ياعينى
الزوجة : اللهم طولك ياروح ياراجل انت هو انت مافيش يوم تعديه كده من غير خناقة
حنفى : وهو انت حد يشوف وشك ومايتخانقش طب ايه رأيك بقى مافيش فلوس النهاردة ويبقى اتصرفى انتى بقى ان شا الله تعملى الاكل زيت وملح
الزوجة :حنفى
حنفى : ياست بقى بلا حنفى بلا زفت أنا خافى فى داهية الهى يارب أرجع الاقى الانبوبة فرقعت فى وشك.
(وبعدين يرزع الباب وينزل )

_________________


عدل سابقا من قبل Verginia في الخميس 5 فبراير 2009 - 12:08 عدل 1 مرات
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:08


فى الشــــارع

(حنفى ماشى فى الشارع بسرعة فخبط ست معدية بكتفه )


الست : حاسب ياحمار
حنفى : ايه قلة الادب دى ؟ ايه حاسب دى ؟
الست : مش تفتح وانت ماشى بدل ما تخبط فى خلق الله كده
حنفى : ياست أنا حر أفتح أقفل عينى وانا حر فيها وبعدين هو حد قالك تمشى فى الشارع مالتاكسيات مالية البلد أهى و لا هى طولة لسان على الفاضى وبعدين ايه اللى حصل يعنى ؟ كسرتلك ايد خلعلتلك رجل فقعتلك عين و لا هو دلع ومياصة وخلاص ؟
الست :على فكرة انت قليل الادب ومش محترم
حنفى : ياسلام ياختى محسسانى انك انتى اكتشفتى حاجة جديدة يعنى
الست : يعنى انت ترضى تعمل كده مع أختك
حنفى : لا طبعا مارضاش ده لو أختى أنا كان زمانى رميتها تحت الاتوبيس اللى جاى هناك ده
الست: لا , واضح انك مش عايز تجيبها لبر
حنفى : أجيبها لبر ليه ؟ هو انتى شايفانى فى البحر وعمال أغرق ولا حاجة
الست : أنا مش هارد عليك لان مستواى وأخلاقى
مايسمحوليش انى ارد على واحد زبالة كده زيك
حنفى : قولتلك بلاش قلة أدب ؟ ايه زيك دى ؟
الست : روح ياعم الله يهديك
حنفى : ماشى ياختى الله يسهلك الهى يارب وانتى ماشية فى الشارع تعدى من تحت بيتنا تقوم الانبوبة اللى هى هتفرقع فى مراتى تفرقع فيكى انتى كمان ستات آخر زمن
(وبعدين يسيب الست ويكمل طريقه فى انتظار مشكلة أخرى )

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:10

فى المواصلات


(حنفى واقف فى الشارع مستنى ميكروباص , حنفى لقى ميكروباص جاى من بعيد فشاورله والميكروباص وقف له)


حنفى : رايح مدينة نصر يا اسطى ؟
الكمسرى : ايوه يا أستاذ تعالى .
حنفى : لا ده أنا رايح الهرم , روح انت
الكمسرى : امال بتقول ليه مدينة نصر ياعم انت , ولاهى عطلة وخلاص
حنفى : ياجدع باطمن ان فيه مواصلات لمدينة نصر , يمكن أفكر أروحها فى يوم ولا حاجة , وبعدين أنا حر أسال السؤال اللى أنا عايزه و لا هى الاسئلة بقت بفلوس اليومين دول ولا ايه ؟
(سواق الميكروباص مشى بالعربية بسرعة قبل ماخناقة تحصل بين الكمسرى و حنفى , حنفى لقى ميكروباص تانى جاى فشاورله والميكروباص وقف )
حنفى : رايح الهرم يااسطى ؟
الكمسرى : ايوه يااستاذ تعالى
حنفى : طيب معاك مكانين فاضيين ؟
الكمسرى : لا والله معلش يابيه , مافيش غير مكان واحد
حنفى : طيب كويس أنا عايز مكان واحد بس , اصل انت لو كان معاك مكانين ماكنتش هاركب .
الكمسرى (عمل انه ماسمعش حاجة ): انت نازل فين ياأستاذ؟
حنفى : نازل الهرم ان شاء الله
الكمسرى (مبتسما ): خوفو ولا خفرع ولا منقرع.
(بعد كده أدرك الكمسرى انه ارتكب غلطة فادحة لما فكر انه يهرج مع حنفى )
حنفى : لا رايح عند أبو الهول ياخفيف , سمعت انه تعبان فقلت لما أروح اطمن عليه يمكن محتاج حاجة منى كده ولا كده و أو يكمن ابنه الهول محتاج حد يوديه المدرسة أهو زى مابيقولك اعمل الخير وارميه فى وش السواقين ياخفيف.
الكمسرى (مكشر) : الاجرة يا بيه
حنفى : عمال أقولك رايح أزور ابو الهول وباكلمك عن عمل الخير و وانت تقولى الاجرة الدنيا بقت وحشه أوى ياجدعان
الكمسرى : يابيه الاجرة لو سمحت عشان أشوف اللى ورايا
حنفى : هو فيه ايه يا رجالة هى مصر كلها بقت مهمة ولا ايه , كل ما أكلم واحد يقولى خلص عشان أشوف اللى ورايا , حاجة تفقع المرارة , ماتكونش انت والولية مراتى فاتحين شركة مع بعض ولا حاجة
الكمسرى : يابيه الاجرة عشان اليوم يعدى , مش عايزين نضايق على حد
حنفى : ياماما , تصدق اترعبت يا أخى , طب ايه رأيك بقى ان أنا مش دافع الاجرة الا لما أنزل , وكله بالقانون
(حنفى طلع رجل بتاع قانون اهو)

الكمسرى : يعنى انت فارقة معاك أوى انك تدفع لما تنزل عن انك تدفع دلوقتى
حنفى : يا جدع أنا حر أدفع دلوقتى , أدفع كمان ثانيتين , أدفع لما أنزل , أدفع المرة جاية , فلوسى و أنا حر فيها .
الكمسرى : وقف يا أسطى لما نشوف أخرتها مع الجدع ده ايه .
حنفى : آه وماله , وقف يااسطى لما نشوف أخرتها معاكو ايه
( الكمسرى يدخل ايده فى بقه ويطلع موس ويحطه على رقبة حنفى )
الكمسرى : هتدفع ولا تتشاهد على روحك
حنفى : هو حضرتك صدقت ولا ايه , ده أنا كنت بهزر معاك يا أخى يااه , ماكنتش أعرف انك عصبى أوى كده , هى الاجرة كام ؟
الكمسرى : جنيه ونص
حنفى : خد اتنين جنيه اهمة , ياراجل اخزى الشيطان وشيل البتاع ده من على رقبتى أبوس ايدك , ده أنا كنت بهزر والله و وآدى ياعم راسك أبوسها.
( الميكروباص كمل طريقه وحنفى قاعد جواه زى الكرسى اللى هو قاعد عليه وحاطط عينيه فى الارض لحد ماوصل لمحطته , حنفى نزل زى الصاروخ وطلع يجرى ناحية أقرب .......حمام )

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:21


حنفى بيجيب فطار

(
حنفى بعد ماخرج من الحمام وحس انه هدى شوية بعد لحظات الرعب اللى عاشها قرر انه يروح يشترى فطار عشان يروح الشغل و بما ان حنفى مصرى فهو أصلا ماعندوش اختيارات فى فطاره , هو فول وبس , حنفى راح على الراجل بتاع عربية الفول اللى بيجيب منه كل يوم )


بتاع الفول (بيكلم نفسه )
ياساتر هو الراجل الرخم ده هييجى كل يوم ولا ايه , ياساتر على الرخامة
حنفى : ايه ياجدع انت شكلك مش طايق نفسك ليه كده؟ ووشك اتغير ساعة ماشفتنى كده ليه؟ ماتكنش شفت عفريت ولا حاجة
بتاع الفول
ياريت ياسى حنفى كان عفريت , أصل انا من غير ماخبى عليك ساعة مابشوفك بحس بانتعاشة كده فى قلبى
حنفى
ليه ان شاء الله , عبيط انت ولا ايه ؟ايه اللى بيخليك تنتعش ياخويا؟
بتاع الفول
أبدا ياسى حنفى أصلهم دايما كان بيقولولى ان أنا مافيش حد فى رخامتى لحد ماعرفتك و اكتشفت ان أنا مجرد تلميذ فى مدرستك
حنفى
طيب ياابو لسان طويل , بطل رغى بقى و اعملى شقتين فول و شقتين طعمية
بتاع الفول
اشمعنى غيرت طلبك النهاردة يا سى حنفى , مانت طول عمرك بتاكل 3 سندوتشات بس
حنفى :
الهى ياشيخ تنطس فى نظرك , الهى وانت ماشى تخبط فى شجرة , الهى عصفورة تعمل على دماغك و ماتلاقيش منديل تمسح بيه . هو أنا كنت باكل من جيب أبوك يابنى ولا انا كنت باجى أطفح عندك ببلاش . انت مالك انت , حاجة غريبة والله , هو انت شغال بياع فول ولا مخبر فى أمن الدولة
بتاع الفول
خلاص ياعم حقك عليا , ياساتر ماكانتش كلمة يعنى , باسألك سؤال عادى , أعوذ بالله , طيب ياسيدى هاعملك طلبك وتاكله بالسم الهارى ان شاء الله ( بصوت واطى)
حنفى :
بترطم بتقول ايه ياابو لسان طويل
بتاع الفول
ولا حاجة , بقول ربنا يكرمك زى ماكرم غيرك قبل كد
حنفى طب خلص عشان أنا اتخنقت منك
]بتاع الفول : امال انا أعمل ايه , ممكن أسالك سؤال ياسى حنفى ؟
حنفى
اتنيل اسأل
بتاع الفول
هو انت ناوى كل يوم تيجى عندى ان شاء الله يعنى

حنفى مضطر يااخويا , أصلك أقرب واحد للشغل , وهو لو كان فى حد غيرك كنت فكرت أقرب منك أصلا و وهو انت الاكل اللى بتعمله ده يبقى أكل بنى آدمين ده أكل بهايم يابنى بس هنعمل ايه بقى , أدينا صابرين

بتاع الفول لا , على فكرة يا سى حنفى فى مطعم فتح جديد على أول الشارع , يعنى قريب أوى أوى من هنا والاكل اللى بيبيعه أكل بنى آدمين فياريت تجربه , ويارب تبقى زبون دايم عنده , وربنا يرحمه بقى
حنفى
ماشى يازبالة , هات الاكل اللى هاطفحه عشان أمشى
بتاع الفول
اتفضل أهو يا حنفى بيه شرفتنا ونورتنا و هتوحشنا والله انت ورخامتك
حنفى :
نور لما يكهربك , ووحش لما ياكلك , يابعيد
بتاع الفول
ده من ذوقك ياحنفى بيه , ومش بعيد عليك الكلام اللى انت بتقوله ده , و أهو الحاجة اللى مخليانى ماردش عليك , انك ماعدتش هاتيجى التانى

حنفى ترد عليا , الهى ترد المية فى زورك ياشيخ , يلا فى ستين داهية أنا خافى يابتاع أكل البهايم

( ومشى حنفى بعد ماحرق دم الراجل اللى ساب شغلانته وباع عربية الفول بتاعته واشتغل لميع جزم , واهو كله من تحت راس حنفى )


_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:29

فى الشغل


(طبعاا زى مانتو مش عارفين , حنفى شغال مدرس فى مدرسة اعدادية , وبما إن اليومين دول فى امتحانات فحنفى كان عنده مراقبة على لجنة . حنفى دخل اللجنة وبدأ يعمل شوية حركات من بتوعه)

حنفى : اسمع يافاشل انت وهو , حسك عينك أى واحد فيكم يفكر , مجرد انه يفكر بس فى إنه يغش حرف من اللى جنبه , والحمام ممنوع , لو العملية قفلت معاك أوى , اعملها على نفسك واحنا هنبقى نتصرفلك فى هدوم , وممنوع حد ياخد أدوات من غيره , انتو جايين امتحان مش محل بلاى ستيشن , سامع يافاشل منك له .
(العيال قعدت تبص لحنفى وهو بيكلم , وكأنها بتبص لمخلوق فضائى جاى من المريخ , ومستغربين انه داخل عليهم سخن أوى , المهم ورق الاجابة جه , وحنفى بدأ يوزع الورق )
حنفى : كل جحش فيكم يكتب اسمه ورقم جلوسه على الورقة من برة ويحط أى حاجة تحت الورقة عشان الكلام مايطبعش وتكتب اسم المادة فى الخانة اللى فوق دى .
أحد التلاميذ :
أستاذ , أستاذ
حنفى :
هو احنا هنبتدى أسئلة من دلوقتى , عايز ايه يا منيل
التلميذ :
هو احنا هنمتحن مادة ايه النهاردة؟
حنفى :
نعم ياخويا, هتمتحن مادة ايه النهاردة , ده انت هتتعلق حالا
التلميذ :
لا والنبى ياأستاذ , كله الا التعليق ده أنا كنت بهزر معاك والله
حنفى :
بتهزر , طيب ,, أنا هاعرفك ازاى تهزر تانى معايا
أحد التلاميذ :
أستاذ , أستاذ
حنفى :
اللهم طولك ياروح , فيه ايه يابنى ,عايز تهزر انت كمان ولا حاجة؟
التلميذ :
لا ياأستاذ , أصل أنا كنت بكتب وأنا سرحان فكتبت اسم اللى جنبى فى ورقتى بدل مااكتب اسمى
حنفى :
الله يخربيتك , هو انت هتبدأ الغش من دلوقتى , يعنى أعملك محضر غش دلوقتى
التلميذ :
محضر غش ازاى ياأستاذ , هو ورق الاسئلة اتوزع لسة ؟؟
حنفى:
ده انت بتتلامض كمان , ده انا هبهدلكم النهاردة , اعمل خط صغير على الاسم اللى انت كتبته واكتب اسمك فوقيه
التلميذ :
بس فى حاجة تانية ياأستاذ
حنفى :
قول ياخويا , ماهو أصلا اليوم باين من أول ماشوفت مراتى الصبح
التلميذ :
الواد اللى جنبى برضه كان سرحان وهو بيكتب اسمه ,فكتب اسمى فى ورقته بدل مايكتب اسمه.
حنفى :
الله يخربيتكم انتو الاتنين , خلاص يا ساقط انت وهو بدلو ورقكم مع بعض
التلميذ :
نبدل الورق ؟! بس ده كده يبقى غش ياأستاذ
حنفى :
ده انت يومك مش هيعدى النهاردة . غش ايه يا أبو جهل ,هوانتو خدتوا ورقة الاسئلة لسة
التلميذ :
هو مش انت كنت عايز تعملى محضر غش من شوية ؟؟
حنفى:
مستعجل أوى على المحضر , ماتقلقش نفسك , المحضر هيتعملك النهاردة لو فضلت تتلامض كتير كده
التلميذ :
لا خلاص , انا اسف ياأستاذ

( ورق الاسئلة جه , وحنفى وزع الورق على التلاميذ)

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:32


حنفى : ماسمعش نفس فيكو دلوقتى , كل واحد فيكو يركز فى ورقته ويكتب اللى هو عارفه , اللى هشوفه بيتلفت بس هاسحب منه ورقته , الامتحان زمنه ساعتين , ساعتين وخمس ثوانى يكون ورق الاجابة كل عندي , واللى هيتأخر عن خمس ثوانى , يبقى ياخد ورقته ويديها للراجل بتاع عربية الفول اللى تحت المدرسة , حد عنده سؤال؟
أحد التلاميذ: أستاذ , أستاذ
حنفى : أيوة
التلميذ : هو يعنى ايه السؤال اللى فى أول الورقة فوق ده ؟
حنفى : قول السؤال و أنا أقولك معناه
التلميذ : مكتوب امتحان دور مايو للصف الثانى الاعدادى 2008/2009

يعنى هو عايز مننا ايه فى السؤال ده ؟

حنفى : عايز يعرف مستوى غباء كل واحد فيكو أد إيه , وبيتهيألى انت هتاخد أعلى نسبة على مستوى الجمهورية
التلميذ : يعنى أكتب فى إجابة السؤال ده نسبة الغباء كام فى المية ؟
حنفى : لا سيبه فاضى وحل اللى بعده على مانسألك مدرس المادة , يافاشل
حنفى : يلا يابنى انت وهو, عدى ربع ساعة و 3 دقايق و33 ثانية , يعنى فاضلكم ساعتين الا ربع الا 3 دقايق الا 33 ثانية , يلا عشان الامتحان طويل
حنفى : خف ايدك بسرعة انت وهو , عدى نص ساعة الا خمس دقايق , يعنى فاضلكم ساعة ونص وخمس دقايق
أحد التلاميذ : ياأستاذ كده حضرتك بتوترنا , مش كل شوية تقول الوقت , احنا كده بنقلق
حنفى : طيب ياعم زويل , محسسنى انك هتنجح يعنى , والنبى ده منظر متعلم أساسا؟!
التلميذ : الله يسامحك ياأستاذ
حنفى : ياعينى يابنى , قطعت قلبى . خلص وبطل كلام , عيال آخر زمن صحيح
(حنفى لقط واحد من التلاميذ بيطلع ورقة مخبيها تحت الطاقية )
حنفى : حلاوتك يامعلم , بتغش ياض
التلميذ : والمصحف الشريف ماغشيت ياأستاذ
حنفى : طلع الورقة بالذوق عشان ماقطعلكش ورقة الاجابة
التلميذ : ورقة ايه ياأستاذ , والله مامعايا ورق ولا حاجة , أنا الحمد لله شاطر ومش محتاج أغش
حنفى : طب اقلع الطاقية
التلميذ : وايه علاقة الطاقية بكلامى مع حضرتك , هى الطاقية هتغش ولا ايه ؟هههههه
حنفى : وكمان بتهزر , اقلع الطاقية يلا
التلميذ : ياأستاذ ماينفعش , أصل أنا عندى الايدز والدكتور قاللى ماقلعش الطاقية دى خالص , أصل أنا لو قلعتها هاعدى كل اللى حواليه , وانت عارف بقى ان الايدز بيجيب كحة وسخونية وحاجات من كده , وأنا خايف عليك والله ياأستاذ
حنفى : يعنى مش هاتقلعها , طيب
( حنفى راح مكتف الواد , وقلعه الطاقية , ولقى الطاقية مردومة ورق)

حنفى : نهارك مش معدى

التلميذ : والله ياأستاذ آخر مرة , أصل أنا لو مانجحتش فى الامتحان ده , أبويا هيطلق أمى
حنفى : الهى البيت يولع بيهم هما الاتنين و العالم يستريح من الاتنين اللى جايبينك , ده انت يابنى كده كتبت على نفسك حكم بالاعدام , ولما تبقى تروح , أبقى طمنى أبوك طلق أمك ولا لسة
التلميذ : عشان خاطرى ياأستاذ
حنفى : خاطر لم يخبطك ويجيبلك ارتجاج فى المخ يابعيد , بره , اطلع برة واعتبر نفسك شلت المادة , عشان تتعلم الادب بعد كده
(الواد خرج من اللجنة , بعد ما حنفى عمله محضر غش , وحنفى كمل مراقبته على اللجنة )
حنفى : فاضل من الوقت ربع ساعة
حنفى : فاضل من الوقت عشر دقايق
حنفى : فاضل من الوقت خمس دقايق
أحد التلاميذ : ايه ياأستاذ , هو انت مركب لساعتك موتور عربية ؟؟
حنفى : خلص ياابو لسان عشان فاضل خمس دقايق , وعشان استظرافك ده , فاضلك دقيقتين بس
التلميذ : طب وتتعب نفسك ليه , اتفضل الورقة أهى ,الله يخربيتك (بصوت واطى)
حنفى : ياسلام على الثقة , أبقى قابلنى ان نفعت . يلا يابنى انت وهو , زى ماقلتلكو قبل كده اللى عايز يجيب ورقته دلوقتى يجيبها , واللى مش عايز بتاع الفول مستنيه تحت .
(حنفى لم ورق الاجابات كله , بعد ماطلع عين العيال ووترهم , وكان السبب فى ان عشر عيال شالو المادة دى ده غير ان الاول على الفصل نقص عشرين درجة فيها .... بركاتك ياشيخ حنفى)

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:38


حنفى فى الاتوبيس


(المعلم حنفى بعد ماخلص الحوار المثير فى الامتحان , ونفد بجلده قبل ماكان العيال تتمطع وتهفه قلم ولا حاجة , حنفى حس انه تعب أوى النهاردة وقرر انه يرجع البيت , حنفى بعد اللى حصله فى الميكروباص , فضَّل انه يركب الاتوبيس المرة دى , الاتوبيس وصل وحنفى طلع يجرى وراه لحد ماعرف يركب )

الكمسرى : يلا يا أستاذ الاتوبيس فاضى اتفضل خش جوة , ماتقفش على الباب
حنفى : فاضى مين ياعم ,ده انت محمل الركاب على بعضهم
الكمسرى : يعنى يا أستاذ , أسيب الناس يعنى ماتروحش بيوتها , انا بعمل كده والله عشانكم , أنا ان كان عليا أنا ممكن أحمل قانونى ومش فارقة معايا يعنى
حنفى : إهئ إهئ إهئ , بس يابنى كفاية , حرام عليك قطعت قلبى , ايه ده يا ولاد , ملاك واقف قدامى , للدرجة دى خايف على الناس وبتركبهم فوق بعض عشان يروحوا بيوتهم , ربنا يكسر من أمثالك , انت هتشتغل نفسك ولا ايه , ياعم الحاج مابلاش نضحك على بعض .
الكمسرى : ماشى ياأستاذ , اتفضل بقى خش جوة عشان أركب الناس اللى على الارض دى .

حنفى : طب مانا عندى اقتراح حلو , ماتبنوا دور فوق وتركبوا الناس فيه , ولا أقولك خليهم دورين , أهو برضه عشان الناس الغلابة اللى عايزين يروحوا بيوتهم
الكمسرى : والله ياأستاذ , شكلك فايق وانا مش فاضيلك , خلصنى بقى
(المهم حنفى استسلم للامر الواقع و وخصوصا انه كان هياكل علقة الصبح من الكمسرى بتاع الميكروباص , المهم حنفى دخل جوة , ولقى نفسه واقف جنب فيل , أو بمعنى أدق واقف جنب ست على شكل فيل , أو بمعنى أدق أوى , اتفعص جنب ست أضخم من الفيل شوية )
حنفى (بيتخنق) : هموت , حاسبى ياحاجة الله يباركلك , مش عارف اتنفس
الفيل : وانا أعملك ايه يعنى , مانت شايف الدنيا زحمة هو أنت لوحدك اللى مذنوق
حنفى : أنا مش مذنوق , أنا مفعوص , الله يباركلك خطوة بس جنبك
الفيل : كان على عينى ياخويا , بس مافيش مكان جنبى أروح فين يعنى , استحمل شوية كلها ساعة وهتوصل

حنفى : ياولية أنا فاضلى دقيقة , وأكون فى عداد المفقودين , أبوس ايدك وسعى شوية

الفيل : والله يبقى اشتكينى للحكومة بقى و هو انا هموت نفسى يعنى , عمالة أقولك مافيش مكان جنبى , وانت مابتفهمش , أعملك ايه يعنى
(المهم حنفى وشه بدأ يزرق , واتخنق و ماعدش عارف يتنقفس , وحس انه خلاص بيودع , بس الفرج جه من ربنا , حنفى لقى الراجل اللى قاعد على الكرسى بيقول للكمسرى "على ايدك ياسطى " الراجل نزل , وحنفى قعد مكانه , وماكانش مصدق ان ربنا نجاه , المهم الست الفيل ماسابتش حنفى فى حاله ودار بينهم الحوار ده )
الفيل : هه , والله رجالة آخر زمن , يبقوا قاعدين ومستريحين وسايبين الستات الغلابة اللى طافحة المر واقفة

حنفى : دلوقتوا بقيتوا غلابة ؟!, طب أنا عايزك تشهدى عيل ماشى فى الشارع , مين الغلبان فينا ؟!, أنا ولا انتى؟!

الفيل : الله يرحم أيام زمان , كان الراجل يشوف الست واقفة , يقوم ويقعدها مكانه , ان شاء الله لو كان المشوار ست ساعات

حنفى : عليكى نور , أيام زمان بقى , هو مش انتوا اللى طالبتوا المساواة بين الراجل والست ,اشربوا بقى

الفيل : ياراجل اختشى , وخلى عندك دم , قوم وقعدنى مكانك ,أنا رجلية وجعتنى من الوقفة ,ده انا فى مقام أختك برضه
حنفى : والله رجليكى وجعتك , ايدك وجعتك , دماغك وجعتك , مش مشكلتى , أنا مالى
الفيل : اما انت راجل ماعندكش دم صحيح

حنفى : المشكلة ان أنا مش عارف أقولك انك ست ماعندهاش دم , لانك محسوبة على الستات غلط أساسا
الفيل : ده انت بتقل أدبك كمان , طيب أنا هاوريك
حنفى : هههه , هتعملى ايه يعنى؟!
الفيل (بعلو صوتها ) : يالهوى , يا خرابى , الحقونى ياناس , الحقونى ياعالم , الراجل ده حرامى , لقيته حاطط ايده فى شنطتى وعايز يسرقنى , الحقونى ياهو
(الحقيقة الست ماكانتش محتاجة تقول كل الكلام ده , لانها بمجرد انها قالت كلمة يالهوى الاتوبيس كله , الرجالة والستات والعيال الصغيرة , كله اتلم على حنفى , وعينك ماتشوف الا النور , الرجالة بتضربوا بالبوانى والشلاليت والستات بتشد فى شعره والعيال الصغيرة دخلوا وسط الناس وراحوا مقلعين حنفى البنطلون , وسبحان الله الناس كانت بتضرب بذمة وكأن الست دى تقربلهم ولا حاجة , وكل اللى كان مضايق من حاجة كده ولا كده , فش غله فى حنفى , ياعينى , المهم بعد الضرب اللى مااضربوش قبل كده حمار فى مطلع , راح اتنين رجالة ماشاء الله يعنى بسطة فى الجسم شايلين حنفى من قفاه وخدوه وطلعوا بيه على أقرب نقطة شرطة , واللى حصل فيها لحنفى بلاوى )



_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:41


حنفى فى قسم الشرطة

(الاتنين الديناصورات شالوا حنفى من قفاه زى مايكونوا صايدين فار وماسكينه من ديله , وطلعوا بيه على أقرب نقطة شرطة , ومعظم ركاب الاتوبيس راحوا وراهم عشان يتفرجوا , والست الفيل كانت فى مقدمة الطليعة على أساس انها محور المشكلة , المهم الاتنين الديناصورات والست الفيل هم اللى دخلوا مع حنفى للظابط , وبقية الناس فضلوا واقفين بره مستنيين , ولا كأنهم مستنيين ست بتولد فى مستشفى ,لدرجة ان واحد منهم من غير ماياخد باله راح قايل يارب ولد , راح واحد تانى قايل يارب بت , راح واحد شيخ كبير فى السن قايلهم , حرام الكلام ده يارجاله اللى يجيبه ربنا كويس , المهم الظابط بدأ يكلم مع الديناصورات )
الظابط : ايه يابنى انت وهو الهيصة اللى انتوا عاملينها دى , أنا عايز واحد فيكوا بس اللى يتكلم ويقولى ايه المشكلة
أحد الديناصورات : الراجل الناقص ده يابيه ,حاول يسرق شنطة الست الغلبانة دى
(الست الفيل راحت ضربة دمعتين على خدها من دموع التماسيح دى , وعملت نفسها ياعينى محروقة ومظلومة )
الست الفيل : أيوه يابيه حاول يسرق شنطتى ومش كده وبس , ده حاول كمان انه , انه , انه ........ اهئ اهئ
الظابط :انه ايه ياست انتى اكلمى
الست الفيل : حاول انه يمد ايده عليا يابيه
حنفى : يانهار مش معدى , آه ياولية يا كدابة , أنا حاولت انى ..
الظابط: انت تخرس خالص وماتفتحش بقك
الست الفيل : ربنا يخليك ليه ياحضرة الظابط , أصلك انت ماتعرفش الراجل ده قليل الادب ازاى , تخيل يابيه بيقول ان الستات دول مالهمش لزمة فى الدنيا وان الحياة هتبقى أحسن من غيرهم
حنفى : وكتاب الله يابيه الولية دى كدابة
الظابط : قولتلك اخرس , ولو اكلمت تانى هاتلاقى القلم نازل على قفاك وهخلى المخبر اللى وراك ده يروقك
حنفى :حاضر يابيه , أن هاخرس خالص أهو وهانكتم , بس كله الا القفا وحياة والديك
الظابط : اتفضلى كملى ياست
الست الفيل : وبيقول كمان يابيه ان الظباط دول ناس وحشين , مع انكو يابيه أجدع ناس والله
(الست الفيل بمجرد انها وصلت لنص الجملة الاخيرة دى , وحنفى حس ان الظابط اللى قاعد قدامه بقى خمس ظباط فى بعض رجليهم لفوق ودماغهم لتحت , وحس بنار قايدة فى قفاه , ومافهمش الا بعد كده ان ده كان أول قفا ياكله من المخبر اللى كان واقف وراه )
حنفى :آآآآآآآآآآآآآآآآآآآآآآآآآآآآآآآآآآه , ايه ياباشا هو فى ايه ؟
الظابط : اخرس , وماسمعش نفسك , القفا اللى انت كلته حالا ده كان مجرد تسخين , انت ماتعرفش القفا الحقيقى بتاع برعى عامل ازاى , فى حاجة تانية ياست عايزة تقوليها
الست الفيل : أيوة يابيه
الظابط :اتفضلى
الست الفيل : أنا باطلب من سيادتك تنفيذ حكم الاعدام فى الجدع دع , لانه خطر على الامن , وبعدين بينى وبينك ياباشا أهو تبقى عملت جميلة وريحت العالم منه
الظابط : انتى عبيطة ياست انتى , اعدام ايه , وبعدين هو احنا فى محكمة عشان تطلبى من سيادتنا تنفيذ الاعدام فيه , عندك تهمة تانية عايزة تقوليها ؟
الست الفيل: لا يابيه ,متشكرين ياسيد الرجالة
الظابط : طب ماسمعش صوتك بقى عشان نعرف نكمل التحقيق
الست الفيل : حاضر ياباشا
الظابط : انته يابنى آدم , الست دى اتهمت دلوقتى ب4 تهم , مجوعهم على بعض ممكن يدخلك السجن 25 سنة , مؤبد يعنى
حنفى : يابيه والله الست دى كدابة ونصابة ومفترية كمان , أنا مظلوم يابيه والله
الظابط : اخرس لحد ماكمل كلامى , التهم الاربعة هى السرقة و التحرش و ونشر أفكار مناهضة للمرأة , والتحريض للانقلاب على نظام الحكم
حنفى : ياخراب بيتك ياحنفى , حكم ايه يابيه , ومناهضة إيه , أنا لوحدى عملت الحاجات دى كلها فى العشر دقايق اللى قعدتهم فى الاتوبيس
الظابط : تحب تدافع عن نفسك , ولا تتصل بالمحامى بتاعك
حنفى : المحامى بتاعى والله يابيه مابيكلمنيش من يوم ماقلتله ان المحامين دول شوية نصابين
الظابط : حلاوتك يامعلم , كده بقوا خمس تهم , آخرهم تهمة السب والقذف
حنفى : يابيه وحياة أبوك براحة عليا شوية , ده أنا راجل غلبان والله , وسيادتك هتعرف حالا بنفسك ان أنا مظلوم والله
الظابط : طيب , نمسك تهمة تهمة , أول حاجة السرقة , الست دى بتقول انك مديت ايديك فى شنطتها وحاولت تسرقها
حنفى : والمصحف الشريف يابيه , الهى يارب أنشل فى رجلى لو كنت باكدب , أنا ماعرف ان كانت الست دى يابيه معاها شنطة ولا معاهاش
الظابط : امال هى هتفترى عليك ليه يعنى ؟كنت جوز أمها مثلا
حنفى : يابيه هى اللى زى دى أمها تعرف تتجوز تانى من أساسه , يابيه الحكاية كلها ان أنا مارديتش أقوم لها واحنا فى الاتوبيس , راحت مصوتة ولمة الناس عليا , وقعدت تقول الكلام الاهبل ده كله
الظابط : يعنى انت مامديتش ايديك عليها وحاولت تتحرش بيها
حنفى : يابيه أنا عايز أطلب منك طلب صغير , وانت اللى هتدافع عنى بعديه , أنا عايزك تبصلها بس يابيه , وتسأل نفسك سؤال صغير ؟ هو أنا ممكن أفكر انى أفكر إنى أفكر أتحرش بيها

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:44


الظابط بص لللست , وراحت الست مبتسمة له ابتسامة عريضة , راح الظابط باصص لصاحب المحضر , وأقوله اكتب "تسقط التهمة الثانية لعدم موضوعيتها ")

الظابط : طب وبالنسبة لموضوع انك بتكره الستات , وعايزهم يختفوا من الدنيا
حنفى : بصراحة يابيه , انا فعلا بكره الستات , بس أنا بالعقل كده أقدر أقول كلمة زى دى لواحدة زى الست دى فى الاتوبيس وهى واقفة و انا قاعد , يعنى ممكن تريح عليا حبتين تقتلنى فى ثانية
(الظابط راح باصص تانى للست , راحت الست فاتحة بقها زى الهبلة وحاولت تضحك ضحكة نجوم السينما , راح الظابط باصص لكاتب المحضر , واقوله اكتب " تسقط التهمة الثالثة لعدم منطقية حدوثها ")حته قانون بقى
الظابط : وموضوع ان الظباط دول ناس وحشين
حنفى : والله يابيه ماقلت حاجة زى كده , وعمرى فى حياتى الكلمة دى ماطلعت من بقى ,أنا صحيح يابيه لسانى طويل ودمى واقف , وطوب الارض بيكرهنى , بس أنا عارف نفسى وعارف ان أنا جبان أوى , يابيه ده الناس كلها بتمشى جنب الحيط الا أنا , دخلت جوة الحيط من زمان , والولية دى زى ماقلتلك يابيه نصابة , وزى ماكدبت قبل كده يبقى ممكن تبقى كدابة دلوقتى , صح يابيه ولا ايه
(الظابط بدأ يتعاطف مع حنفى , وخصوصا بعد ماخد باله من الشوارع والنوادى والمواقف اللى الركاب رسموها على وش حنفى بالبوانى والشلاليت , فقرر انه يسقط التهمة الرابعة عنه ")
الظابط : كده انت عديت من الاربع تهم اللى فاتوا , لكن الخامسة ياحلو مش هتقدر تفلت منها , لانى سمعتها منك بودانى , ايه ردك على التهمة
حنفى : والله يابيه أنا ماقصدت الكلام ده , بس هو الموضوع ان أنا أهلاوى والمحامى بتاعى زملكاوى , وكنا إصحاب أوى , فكنت قاعد انا وهو بنتفرج على ماتش الاهلى والزمالك فالاهلى غلب فى الماتش ده , فراح المحامى قايم وضربنى وقالى هو انتوا كل شوية تغلبونا , ايه ياجدع , فقمت قايله الكلتين دول , عشان أرد عليه بس , وهو ده الموضوع كله ياباشا
(الظابط لما عرف ان حنفى أهلاوى , تعاطف معاه أوى , أوى , وقرر انه يطلعه براءة من الليلة دى , وخصوصا ان التهم كلها ضعيفة جدا واتأكد ان الست دى كدابة , بس فضل تهمة واحد بس وهى السرقة , فالظابط حب يتأكد منها تانى )
الظابط :انتى ياست انتى بتقولى ان الراجل ده حاول يسرق شنطتك , مظبوط
الست الفيل: أيوة يابيه , ولولا ستر ربنا كان زمانه خدها منى , أوعى تسيبه يابيه , ده بيضحك عليك
الظابط : فين شنطتك دى ياست ؟
(الظابط لما سأل الست السؤال ده كأنه بالظبط دلق عليها جردل مية ساقعة)
الست الفيل : الشنطة؟! آه , شنطة ايه ؟ الشنطة بتاعتى ؟ ماهى ... أصل... القطة كلتها وأنا جاية لسيادتك , أصل القطط دايما بتاكل الشنط بتاعتى
الظابط : القطة كلتها ! اكتب يابنى " يتم الافراج عن المتهم لعدم صحة التهم , كما يتم حبس المتهمة 4 أيام بتهمة الادعاء الكاذب و إزعاج السلطات "
الست الفيل : ياخرابى , حبس ايه يابيه , هو انا اللى سرقت الشنطة , طب على الاقل لو مش هتحبسو الجدع ده , احبسوا القطة , انما تحبسونى أنا ليه ؟
الظابط : اكتب يابنى , يتم الافراج عن المتهمة وعرضها على طبيب أمراض عقلية للاشتباه فى عدم صحة قواها العقلية
حنفى : ربنا يخليك لينا ياباشا , يحيا العدل , أنا كنت عارف ان حضرتك مش هتظلمنى أبدا , ربنا يكتر من أمثالك
الظابط :هات بطاقتك بقى عشان نقفل المحضر
حنفى : اممممممممم !!! ماعييش بطاقة والله يابيه , بس أنا إسمى حنفى لو حضرتك عايز تعرفه يعنى
الظابط : اكتب يابنى , يتم حبس المدعو حنفى يوم واحد لعدم حمله اثبات شخصية .
(حنفى أغمى عليه لما سمع الكلمتين دول , لانه ماصدق انه خلاص هاينفد بجلده )


_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:49

حنفى فى التخشيبة


( المخبر اللى كل حنفى قلم على قفاه والظابط بيحقق معاه , حب حنفى أوى وحس ان قلبه استريحله , وبما ان حنفى هيقضى ليلة فى التخشيبة , فالمخبر حب يخليها ليلة تعلق فى نفوخ حنفى لحد مايموت , فدخله زنزانة محطوط فيها 4 محكوم عليهم بالاعدام - شلبى , مطوة , حماصة ,شطة – المهم حنفى دخل الزنزانة , والزنزانة باختصار عبارة عن أوضة عادية جدا , بس ضيقة شوية , وفيها 4 عواميد كبار أوى , فهم بعد كده انهم المساجين الاربعة مش عواميد ولا حاجة , المهم حنفى حط لسانه جوة بقه ونقى مكان فى الزنزانة وقعد فيه , وكان من جواه مرعوب من الكائنات اللى قاعدة معاه فى الاوضة , لانه حس انه فاضلهم ثانيتين , ويقوموا ياكلوه )


شلبى : أهلا مرحب , بالكتكوت الصغير , اسم الحلو ايه ؟
حنفى : خدامك وملمع جزمتك حنفى
مطوة : هأ هأ هأ , حنفى ؟! هو لسه فى حد اسمه حنفى اليومين دول
حنفى : معلش ياباشا , منه لله أبويا بقى الله يرحمه هو اللى غلط الغلطة دى , أصله ماكانش عارف وهو بيسمينى انى أن هقابل سعادتك , بس وكتاب الله المجيد لو كان يعرف لكان غير اسمى فى ساعتها , الله يرحمه بقى ياباشا
حماصة : والحلو تهمته ايه ؟ قتل ولا حرق ولا آداب ولا تكونش وزير ولهفت كام ميت مليون فى كرشك
حنفى : وزير إيه بس ياباشا وكرش ايه ؟ والنبى ده منظر وزير , بلاش , هو انا عندى كرش أصلا عشان أحط فيه دبوس فرخة حتى
شطة : انت بتكلم كتير ليه ياكتكوت , ماترد على اد السؤال وبلاش لف ودوران
حنفى : حاضر ياباشا انت تؤمر , أنا تهمتى انى ماعييش بطاقة
شلبى : انت هتستعبط يلا
حنفى : ورب الكعبة ياباشا هى دى تهمتى
شلبى : يعنى انت عايز تفهمنى انك جاى مع 4 محكوم عليهم بالاعدام , عشان معاكش بطاقة
(حنفى سمع الجملة الاخيرة دى , ولقى الدنيا ضلمت فجأة و بقى فى عالم تانى , أصله من الصدمة أغمى عليه )
مطوة : ايه يامعلم شلبى ؟ انت عملت للواد ايه , ده باينه مات , ولا دخل فى غيبوبة
شلبى : مايدخل , ان شا الله يدخل الثانوية العامة حتى, احنا مالنا , وبعدين احنا هنخاف من ايه ياض يامطوة , ده احنا محكوم علينا بالاعدام
مطوة :على قولك يامعلم , بس بينى وبينك , انا عايز اعرف ايه حكاية الواد ده ؟, وايه اللى رماه علينا هنا ؟ , هو احنا يعنى يامعلم بيجيلنا كل يوم فرصة زى دى ؟ أنا هفوقه
شلبى : عين العقل ياض يامطوة , مع انى أول مرة فى حياتى ألاقيك بتشغل مخك , ده انا كنت فاكر انك ماعندكش مخ
مطوة : اتريق براحتك يامعلم , هو أنا أقدر أقولك حاجة , ده انت معلمى برضه
( مطوة راح جايب جردل مية ساقعة , وراح دلقه على حنفى )
حنفى : هه هه هه , بسم الله الرحمن الرحيم , اعوذ بالله من الشيطان الرجيم , انصرف انصرف
شلبى : ايه يابنى اهدى , فيه ايه؟!
حنفى : أصل بعيد عنك كنت بحلم بكابوس , قال ايه انا اتحطيت فى زنزانة فيها 4 محكومين عليهم بالاعدام , وماقلكش الاربعة دول شكلهم عامل ازاى , أقل وصف ليهم انهم شبه الخرتيت , وفى واحد فيهم كده اعوذ بالله شبه ابليس , من ساعة مادخلت الزنزانة دى وهو عامل معايا تحقيق , وتحس انه عامل فيها المعلم بتاعهم مع انه شكله راجل اهبل أوى , ولا التلاتة اللى معاه , عاملين زى الخدامين , وشكلهم بيئة أوى , لا واللى يضحكك ان الراجل الكبير بتاعهم لما سالنى انت اسمك ايه , قولتله خدامك وملمع جزمتك حنفى , هههههههههههه , انا أبقى خدام الراجل الاهبل ده , لا واللى يموتك من الضحك ان أنا كنت بقول لكل واحد فيهم ياباشا , باشا مين دول شوية صيع , يلا الحمد لله انه طلع كابوس
(حنفى الله يكرمه بعد ماحكى الكابوس بالتفصيل الدقيق , وبعد ماتوصى فى وصف الاربعة , لقى الدنيا اتشقلبت وبقى شايف كل حاجة بالمقلوب , وفهم اللى حصل لما لقى شلبى بيبصله وعينيه حمرة , ولما عرف انه ماكانش فى كابوس ولا حاجة , وانه داخل على أسود موقف فى حياته , وخصوصا انه فهم ان هو دلوقتى متعلق من رجله , ودماغه لتحت )
حنفى :آآآآآآآآآآآآآآآه , العفو ياباشا والله العظيم ماكان قصدى , أنا كنت فاكر انى فى كابوس , وعلى فكرة اللى انا كنت بكلم عليهم دول ناس تانية خالص , مافيش أى شبه بينهم وبينكم
شلبى : والله , بقى انا راجل أهبل يلا
حنفى : ينقطع لسانه اللى يقول عليك كده
شلبى : ماهو هينقطع حالا
مطوة : واحنا كلنا شبه الخرتيت يلا
حنفى : تنقطع رجله اللى يقول عليكم كده يازينة شباب المحروسة
مطوة : ماهى هتنقطع حالا
حماصة : واحنا يلا شوية خدامين
حنفى : تنقطع ايده اللى يقول عليكم كده
حماصة : ماهى هتنقطع حالا
شطة : واحنا يلا شوية صيع
حنفى : تنقطع رقبته اللى يقول عليكم كده
شطة : ماهى هتنقطع حالا
حنفى : طب انتو كده هتسيبولى ايه بقى
شلبى : هنسيبلك ضوافرك بعد مانخلعها من ايدك
حنفى : ارحمونى ياجدعان , هو انتو مافيش فى قلبكم رحمة , ده انا راجل غلبان والله , طب أنا هعرض عليكم عرض
شطة : قوووول , وانفد بجلدك , فبل مانشرحك
حنفى : نزلونى وماتعملوليش حاجة , وانا هبقى خدامكم , وهعملكم كل اللى انتو عايزينه , وأى حاجة تطلبوها هانفذهالكم , انتوا تناموا بشوات كده , وانا ابقى الخدامة بتاعتكم
حماصة : والله فكرة حلوة يامعلم شلبى , أهو برضه يريحنا , واحنا لو شرحناه مش هنستفيد حاجة
حنفى : يسلم فمك يا أجدع شخصية فيكى يابلد
حماصة : قلت ايه يامعلم؟
شلبى : ماعنديش أيتها مانع , نزل الخرووف ده يامطوة , ولما نشوف ايه أخرتها معاه
مطوة :حاضر يا معلمى

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:52


مطوة نزل حنفى , بعد ماعيشوه الرعب , لحد ماشعره شاب , وحنفى بدأ ينفذ عرضه اللى عرضه عليهم )
حنفى : بس يامعلم الاول ممكن أعرف اساميكم عشان مش معقول هبقى الخدامة بتاعتكم , ومش عارف أساميكم
شلبى : ماشى ياكتكوت , انا أبقى سيدك وسيد اللى خلفوك , وسيد عيلتك كلها , شلبى , وبشتغل جزار
حنفى : ربنا يخليلك لحمتك يامعلم ويباركلك فى ساطورك , يا أهلا وسهلا
مطوة : وانا أبقى صبى سيدك المعلم شلبى , مطوة
حنفى : اهلا وسهلا يا أستاذ مطوة , ربنا يبارك فيك لحد ماتبقى ساطور ان شاء الله
حماصة : وانا سيدك وتاج راسك , حماصة , صاحب مقلة لب
حنفى : ربنا يكرمك , ويزودك سودانى كمان وكمان
شطة : وانا سيدك شطة , عندى عربية كشرى
حنفى : ربنا يوفقك , ويكترلك من الدقة , قادر ياكريم , أنا مش عارف أوصفلكم يارجالة أنا أد ايه فرحان عشان اتعرفت عليكم , والله انا عايز أعيط من كتر الفرح , وعايز أصوت من كتر السعادة , ربنا يخليكم لمصر
شلبى : بطل رغى بقى يلا , وابدأ الشغل
(حنفى اشتغل مرمطون عند ال4 , بيغسل ويمسح وكل مايغسل حاجة ويديهالهم , يقوموا يوسخوها , ويخلوه يغسلها تانى , المهم بعد حوالى 5 ساعات مرمطة , مطوة راح موطى على ودن شلبى وقاله انهم لسه ماعرفوش حكاية حنفى )
شلبى : واد ياحنفى
حنفى : ايوه يامعلم
شلبى : سيب اللى فى ايدك وتعالى أقعد معانا هنا , عايزينك فى كلمتين
حنفى : أأمرنى يامعلم
شلبى : عايزين نعرف انت ايه حكايتك بالظبط , وايه اللى رماك الرمية السودة دى
( حنفى حكى الحكاية كلها ليهم , من ساعة ماحط رجله فى الاتوبيس لحد ماحط رجله فى السجن , وحكالهم على القلم اللى كله من المخبر , المهم ال4 حسوا بشوية تعاطف مع حنفى بعد ماسمعوا حكايته , فمارضيوش يشغوله مرمطون تانى )
حنفى : ممكن أطلب منكم طلب
حماصة : قووول
حنفى : ممكن تحكولى على حكايتكم وايه اللى عملتوه عشان يتحكم عليكم بالاعدام
شلبى : ممكن , بس ده عشان أحنا حسينا انك انت راجل جدع بس , عارف لو حد غيرك كنا قطعنا رقبته عشان اتجرأ وسألنا سؤال زى ده
حنفى : ايه يامعلم , انت محسسنى ان قطع الرقبة ده كأنك بتأزأز لب , مابراحة عليا شوية يامعلم , أنا قلبى بيقف من الكلام ده
شلبى : ماشى ياحنفى , بلاش قطع الرقبه , خليها سلخ جلد
حنفى : احكى احكى يامعلم أنا هاحرق دمى ليه
شلبى : بص بقى ياعم , فى يوم من الايام , كنا لسه بنقول اصطبح ياصبح , وماكنتش لسه ضربت الحجرين بتوعى , بعيد عنك , انا لما مابضربش الحجرين على الريق كده ببقى نفسه أموت ايتها حد , المهم قعدت على الكرسى وقلت للواد مطوة يروح يجهزلى الحجرين ويجيبلى الفطار , ويشتريلى الجرنان , صحيح انا مابعرفش أقرا ولا أكتب , بس أنا اتعودت انى أشترى الجرنان كل يوم , المهم الواد مطوة مشى من هنا , ولقيت راجل كده لابس بدلة و حاطط نضارة سودة على عينيه , ومش عارف كان شايف ازاى و هو ماشى , الراجل راح قالع النضارة , وراح باصصلى وقالى انت صاحب المحل ؟ مارديتش عليه , قاللى انت اطرش يابنى آدم انت ؟ هو أنا مش بكلمك ؟ أنا مسكت نفسى وقلت اللهم طولك ياأجدعها روح , قلت له ايوه أنا صاحب المحل , قالى طاب قوم اقطع لى عشرة كيلو , قلتله ماعندناش لحمة النهاردة , قالى انت مش عارف انت بتكلم مين ؟ قلتله هاكون بكلم مين يعنى ؟ قالى انا وزير ياحيوان , هو قال حيوان من هنا قمت قايم جايب أقربها سكينة منى وقمت باجج بطنه وجايب أجله , مافيش كلها يومين وكان الحكم بالاعدام طلع , بذمتك ياحنفى أنا كده أبقى غلطان
حنفى : لا طبعا يامعلم , حاشا , وماشا , ده انت العيب عداك , بس فيه حاجة انا استغربتلها فى حكايتك , وهى ازاى يعنى وزير وهينزل بنفسه يشترى لحمة
شلبى : مانت بتفهم أهو ياحنفى , ماهو انا بعد كده عرفت انه ماكانش نازل يشترى لحمة ولا حاجة , ده هو كان نازل بنفسه يعمل حملة على محلات الجزارة , عشان يخربيت الجزارين , يبقى يستاهل اللى اتعمل فيه , ولا مايستاهلش
حنفى : يستاهل يامعلم , بس ايه دخل مطوة فى الموضوع ده
مطوة : لا أنا ماليش أى دخل فى الليلة دى , هو انا رجعت يوميها لقيت المعلم مقبوض عليه , وعرفت الحكاية من الناس اللى واقفة , فرحت زرت المعلم يوميها فى السجن , وقلتله ماتخافش يامعلم براءة بإذن الله , قاللى يابنى براءة مين انت أهبل , انا متأكد انى هاخد اعدام , المهم رجعت يوميها البيت وانا مضايق وقعدت أقول لنفسى ازاى أسيب المعلم ياخد إعدام , وبعدين هو أحسن منى عشان ياخد إعدام وانا أقعد فى البيت , المهم وانا عمال آخد وأدى مع نفسى فى الكلام وصلت البيت فلقيت مراتى بتفتحلى الباب والسكينة فى ايدها , اصل أنا كنت واكلها علقة قبل ماأنزل , رحت واخد السكينة من ايديها ومخلص عليها , بس هى دى الحكاية
حنفى : لا ماشاء الله عليك مخلص جدا , ليك الجنة ان شاء الله على اخلاصك للمعلم
حماصة : أما أنا بقى ياسيدى , واحد جه قالى ان مراتى بتخونى مع واحد غريب فى الشقة , رحت رايح البيت بسرعة سمعت صوت مراتى وصوت راجل جوة , رحت نازل جايب مسدس وقمت فاتح الباب ومن غير مابص رحت ضارب الرصاص فيهم الاتنين , وبعد ماقتلتهم بصيت لقيت الراجل ده يبقى محمد أخوها وكان جاى يزورها , لقيت جوايا بركان بيغلى , رحت واخد نفسى وطلعت على المكان اللى فيه الراجل اللى جه قالى ان مراتى بتخونى , ورحت مفرغ المسدس فيه , وأدينى هنا أهو هموت قريب , وقتلت مراتى وأخوها , وكل ده عشان ماتأكدتش من المعلومة

_________________
الرجوع الى أعلى الصفحة اذهب الى الأسفل
جارة القمر
مشرف أداري
مشرف أداري
avatar

انثى
عدد الرسائل : 5694
العمر : 32
تاريخ التسجيل : 22/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:55

في البيت

بس كان بلاش قدام العيال هههههههههه

في الشارع

ينيلو ربنا لمنيح الى مالمت عليه الناس واضرب كان احسن لو

في الشغل



حتى العيال بتضحك عليه من تحت لتحت على منظرو ههههههههههه
شوفي شكلو عامل ازاي لما يطرد طالب


تقبلي مروري ياغالية بكفي كدة انا على شكلو بقيت اضحك هههههههه

والله عسل والله



_________________







[center]يا ربِّ إنْ عـَظـُمتْ ذنوبي كثرة ً *** فلقد علمتُ بأنَّ عفوكَ أعظــمُ

إنْ كانَ لا يرجوكَ إلا مـُحســـن ٌ *** فبمـَنْ يلوذ ُ ويستجيرُ المجـرمُ

أدعوكَ ربـِّي كما أمرتَ تـضرُّعا ً*** فإذا رددتَ يدي فمنْ ذا يرحـمُ

ما لي إليكَ وسيلة ٌ إلا الرَّجـــــــا *** وجميل ظنـِّي ثمَّ أنيَّ مـُســـلمم


[/center]
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 12:57


شطة : أنا بقى حكايتى غير الحكايات دى خالص , انا كنت فى يوم وانا شغال على عربية الكشرى جالى زبونة كنت فاكرها من البنات اياهم , وقعدت تاكل عندى , فأنا قعدت أعاكسها , وأقولها كلام قبيح , قامت مطلعة الوبايل وكلمت جوزها , مافيش خمس دقايق ولقيت جوزها جه ,وقام ماسكنى ونزل فيه ضرب , قمت ماسك السكينة , وضاربها فى رقبته , قام واقع على الارض ميت , فالبت قعدت تصوت وراحت نطة عليا وقعدت تعضنى من رقبتى , قمت ماسك السكينة وخابطها فى بطنها , وخلصت عليها , وعرفت بعد كده انها كانت حامل وان انا لما ضربتها فى بطنها , موتها وموت الجنين اللى فى بطنها كمان , وانا يا استاذ حنفى والله ماكان قصدى أعمل أى حاجة من الحاجات دى , بس هو الشيطان بقى اللى غوانى وخلانى أعمل كده , وادينى هنا اهو زى مانت شايف بنام كل ليلة وانا بسال نفسى ياترى هى دى هتبقى آخر ليلة ليا فى الدنيا ولا لسة شوية , ده غير ان انا كل لما بنام بحلم بنفس الكابوس كل يوم , وهو ان البت اللى قتلتها قاعدة هى وجوزها فى حتة جميلة أوى كلها خضرة ومية وقاعدين مبسوطين أوى وبيضحكوا ومعاهم ولد صغير جميل أوى وبيبصوا عليا وانا مربوط بحبال كتيرة وجسمى فيه 3 سكاكين واحدة فى رقبتى و2 فى بطنى وبعدين انا بقعد اصرخ من الوجع واستنجد بيهم عشان ييجوا يلحقونى , بس هم بيبصوا عليا وبعدين يضحكوا مع بعض تانى ولا كانهم شافوا حاجة , وانا بصرخ وبتقلب عشان احاول اخلص نفسى من الحبال الاقى نفسي فجاة واقع , واحس ان انا بقع من جبل عالى أوى وفى القاع بتاعه حفرة أد مصر دى كلها عبارة عن نار , والنار دى انا هقع فيها , وبعدين بقوم من النوم مفزوع وبقعد أعيط ييجى ساعة بعدها من الرعب , والموضوع ده بيكرر معايا كل يوم , وانا حكيت لشيخ شكله راجل تقى كنت قابلته من فترة فى السجن العمومى قبل مانيجى الزنزانة دى , والشيخ ده كان مسجون سياسى , المهم فسر لى الحلم على ان البنت وجوزها وابنها دخلوا الجنة لانهم اتقتلوا ظلم , وان السكينة اللى فى الرقبة عشان انا ضربت الراجل فى رقبته , والسكينتين اللى فى البطن عشان انا ضربت البت فى بطنها فقتلتها وقتلت الجنين كمان , وحفرة النار اللى انا كنت هاقع فيها فدى تبقى جهنم , وقاللى يابنى توب لربنا عشان ربنا يغفر لك , بس انا خايف أوى يا أستاذ حنفى , انا مرعوب من انى أخش جهنم , أنا .........

(وفجأة شطة خش فى نوبة عياط , وكل اللى قاعدين حاولوا يهدوه لكنه انفجر فى العياط كانه ماعيطش بقاله خمسين سنة , وكل اللى قاعدين سكتوا وماحدش فتح بقه لحد ماحنفى قرر انه يكسر الصمت ده , وبدأ يكلم معاهم )

حنفى : بصوا ياجماعة , انا هقولكم كلام عمرى ماقلته لاى حد قبل كده فى حياتى ,والكلام ده ليكم كلكم بشكل عام , ولشطة بشكل خاص, لان طول عمرى انسان ندل , ورخم , ودمى واقف , وعمرى مافكرت انى أقول لاى حد قبل كده كلمة عدلة , بس أنا وانا بسمعكم دلوقتى , حسيت ان الانسان مهما كان فيه شر , ومهما كانت الناس شايفاه انه وحش وشرير وماعندوش رحمة , بيقى فى قلبه خير , ولو جزء صغير جدا منه , والدليل هو , مع انكم عملتو جرايم من أبشع الجرايم اللى ممكن يعملها البشر , وكنتوا سبب فى موت ناس بريئة مالهاش ذنب فى أى حاجة , الا انكم وانتوا بتحكوا الحكايات دى كنتوا ندمانين أوى , وده فى حد ذاته خير , وانتوا ربنا كتب عليكوا انكم تموتوا قريب , وربنا لوحده هو اللى فى ايده انه يسامحكم أو يعذبكم , فانتو الفترة اللى مكتوبالكم انكم تعيشوها قبل الاعدام توبوا فيها لربنا واعبدوه فيها أوى , واسالوه انه يسامحكم , أنا عارف انكم ممكن ماتكونوش صليتوا قبل كده ولا ركعة فى حياتكم , بس ربنا رحيم , وممكن بعبادتكم ليه فى الفترة دى يدخلكم الجنة .

(حنفى وهو بيكلمهم , كانوا قاعدين مركزين معاه فى كلامه جدا , وحنفى بدأ يكلمهم عن قصص رحمة ربنا , وحكالهم قصة قاتل الـ99 , وبعدين قام معاهم , وعلمهم ازاى يتوضوا ويصلوا , وهو بيعلمهم الصلاة , لقى الفجر بيأذن , راح مصلى بيهم امام وقرا فى الصلاة

" قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ , وَأَنِيبُوا إِلَى رَبِّكُمْ وَأَسْلِمُوا لَهُ مِن قَبْلِ أَن يَأْتِيَكُمُ الْعَذَابُ ثُمَّ لا تُنصَرُونَ , وَاتَّبِعُوا أَحْسَنَ مَا أُنزِلَ إِلَيْكُم مِّن رَّبِّكُم مِّن قَبْلِ أَن يَأْتِيَكُمُ العَذَابُ بَغْتَةً وَأَنتُمْ لَا تَشْعُرُونَ , أَن تَقُولَ نَفْسٌ يَا حَسْرَتَى علَى مَا فَرَّطتُ فِي جَنبِ اللَّهِ وَإِن كُنتُ لَمِنَ السَّاخِرِينَ , أَوْ تَقُولَ لَوْ أَنَّ اللَّهَ هَدَانِي لَكُنتُ مِنَ الْمُتَّقِينَ , أَوْ تَقُولَ حِينَ تَرَى الْعَذَابَ لَوْ أَنَّ لِي كَرَّةً فَأَكُونَ مِنَ الْمُحْسِنِينَ , بَلَى قَدْ جَاءتْكَ آيَاتِي فَكَذَّبْتَ بِهَا وَاسْتَكْبَرْتَ وَكُنتَ مِنَ الْكَافِرِينَ , وَيَوْمَ الْقِيَامَةِ تَرَى الَّذِينَ كَذَبُواْ عَلَى اللَّهِ وُجُوهُهُم مُّسْوَدَّةٌ أَلَيْسَ فِي جَهَنَّمَ مَثْوًى لِّلْمُتَكَبِّرِينَ , وَيُنَجِّي اللَّهُ الَّذِينَ اتَّقَوا بِمَفَازَتِهِمْ لَا يَمَسُّهُمُ السُّوءُ وَلَا هُمْ يَحْزَنُونَ "

حنفى وهو بيقرا الايات , كان سامع صوت عياط من وراه عالى جدا , لدرجة ان هو نفسه انفجر فى العياط , ومابقاش عارف يكمل قراية , ولما خلص الصلاة وسلم , لقى الاربعة بيسلموا عليه , وكل واحد راح واخده فى حضنه , وقعدوا يشكروه , ويقولوله ان كلامه ده أثر فيهم جدا , حنفى حس انه بقى انسان تانى , و كان اليوم اللى قعده فى السجن علق فى نفوخه فعلا زى ما المخبر كان عايز بالظبط , علق فى نفوخه لانه كان يوم التغيير فى حياته )


_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 13:01


حنفى والنيولوك

(حنفى خرج من السجن وهو مصمم على انه يبقى حاجة تانية خالص , لان اليوم اللى قعده فى السجن أثر فيه تأثير غير عادى , وقرر ان يبقى من النهارده شخص محبوب وشخص متعاون مع الناس كلها , وأول حاجة حنفى عملها انه طلع على أقرب جامع صلى فى ركعتين شكر لربنا على اليوم اللى قعده فى السجن , وصلى ركعتين قضاء حاجة عشان ربنا يوفقه فى انه يغير من نفسه , بعد حنفى ماخلص صلاة قرر انه يعدى على كل الناس اللى بيكرهوه ويتأسف لهم ويعرفهم انه عرف غلطه وانه ماعادش هيعمل أى حاجة تضايقهم بعد كده , حنفى قرر انه يتأسف الاول لاهم اتنين , واكتر اتنين كان مطلع عينهم , بياع الفول اللى بقى بيلمع جزم , ومراة حنفى , حنفى طلع على ملمع الجزم )
ملمع الجزم : ايه ياحنفى بيه , عايز منى ايه تانى , عربية الفول وبعتها عشان خاطرك , عايزنى ابيع عدة التلميع كمان , ابوس ايدك يا أستاذ حنفى سيبنى فى حالى
حنفى :سلامو عليكو يا عم محمدين
عم محمدين : سلامو عليكو ؟! سلامو عليكو ؟! ايه اللى جرالك يااستاذ حنفى , ده انت بتشوفنى كل يوم بقالك عشر سنين وعمرك ماقلتلى سلامو عليكو
حنفى : انا جاى لك النهاردة ياعم محمدين عشان أقولك ان انا اسف على كل كلمة وحشة قلتهالك , واتاسفلك على كل حاجة ضايقتك فيها , واوعدك من النهاردة انى ماعدتش هازعلك فى اى حاجة تانى خالص
عم محمدين : بسم الله الرحمن الرحيم , أعوذ بالله من الشيطان الرجيم , حنفى بيه بيقول انا آسف , انت كويس يا استاذ حنفى؟! أجيبلك الدكتور ولا حاجة
حنفى : ياعم محمدين انا كويس والله , بس هو انا حصلى حاجة امبارح خلتنى أفوق واعرف انا كنت غلطان فى حياتى كلها , وانا بحاول أصلح غلطتى أهو , وجاي اتاسفلك , وياريت تقبل أسفى
عم محمدين : أقبل أسفك ؟! انت بتقول ايه يااستاذ حنفى , ده نهار الهنا , هو انا اطول , ده انا بيتهيالى يا استاذ حنفى ان انا ابقى اول واحد تتاسف له فى حياتك
حنفى : عندك حق ياعم محمدين والله , انت فعلا أول واحد اتاسف له فى حياتى كلها , بس صدقنى ياعم محمدين انت مش هتبقى آخر واحد
عم محمدين : انا مش عارف أقولك ايه يا استاذ حنفى , انا حاسس ان انا بكلم مع واحد تانى غيرك والله , ربنا يهديك ويثبتك على اللى انت فيه ده , وانا ياسيدى مسامحك على كل اللى عملته فيا , وهافتح من النهارده صفحة جديدة معاك , وهاعتبرك صاحبى بس على شرط انك توعدنى انك هتفضل كده على طول
حنفى : أوعدك ياعم محمدين
عم محمدين : بس هو فى مشكلة يا استاذ حنفى
حنفى : ايه هى ياعم محمدين ؟
عم محمدين : انا كنت قاعد امبارح مع متولى اللى شغال على عربية البطاطا اللى على أول الشارع , عارفه ؟
حنفى : أيوه عارفه
عم محمدين : المهم بقى ياسيدى , سالنى امبارح "هو الراجل الرخم ده ماجاش النهاردة ليه؟ " قلتله ماعرفش بس الحمد لله ياريت مايجيش كل يوم أو ياريت ربنا يكون خده , ماتزعلش منى يا أستاذ حنفى يعنى , بس انت عارف انت كنت عامل فيه ايه
حنفى : ولا يهمك يا عم محمدين , بس فين المشكلة بقى ؟
عم محمدين : ماهو متولى راح قايللى حرام عليك يااخى ماتدعيش ان ربنا ياخده , مش يمكن ربنا يهديه ويبقى راجل طيب وكويس , قلتله حنفى يبقى راجل طيب كويس , طب ندرا عليا لو حنفى ده بقى كويس لطلع خمسين جنيه لله , وسبحان الله يا استاذ حنفى مافاتش يوم على الكلام ده الا وتيجى انت النهاردة وتتاسفلى وتقولى انك بقيت حاجة تانية , وانت عارف يا استاذ حنفى ان انا ماعييش خمسين جنيه عشان أطلعهم لله
حنفى : ولا يهمك ياعم محمدين , خد دول 100 جنيه طلع خمسين منهم لله وهات بالخمسن التانية حاجة حلوى لولادك
عم محمدين : استاذ حنفى , وكتاب الله انت لازم تروح لدكتور حالا , انت مش استاذ حنفى اللى انا عارفه والله , طب هو انت مسكت سلك كهربا ولا حاجة , طمنى يااستاذ حنفى
حنفى : ياعم محمدين انا والله كويس , الموضوع كله النهاردة أسعد يوم فى حياتى , النهاردة عيد ميلادى من جديد , ماتشغلش بالك انت بس ياعم محمدين وخد الفلوس وروح اشترى لولادك ومراتك حاجة تفرحهم بيها


عم محمدين
روح ياشيخ ربنا يكرم أصلك , ربنا يسترها فى طريقك , وييسرلك أمورك , ويباركلك فى مراتك , ويرزقك بعيال يملوا عليك البيت , انا عارف ان ربنا لسة مارزقكش بعيال , بس ان شاء الله ربنا هيكرمك , ربنا يفرحك يا حنفى يابن أم حنفى يارب
حنفى آمين , ربنا يسمع من بقك ياعم محمدين , انا هسيبك وامشى لانى عندى مشوار مهم لازم أعمله برضه , ولو عزت أى حاجة أوعى تتكسف , انا زى أخوك , وياريت ترجع عربية الفول تانى , عشان وحشنى الفول بتاعك , سلامو عليكو

عم محمدين
وعليكم السلام يا أمير يابن الامرا

_________________
الرجوع الى أعلى الصفحة اذهب الى الأسفل
Verginia
مشرف أداري
مشرف أداري
avatar

انثى
عدد الرسائل : 1209
العمر : 34
البلد : Egypt, cairo
تاريخ التسجيل : 08/11/2008

مُساهمةموضوع: رد: يوميات المواطن حنفي   الخميس 5 فبراير 2009 - 13:09


حنفى ساب عم محمدين يضرب أخماس فى أسداس , وطلع على البنك , وسحب 3000 جنيه من رصيده مع انه عمره ماسحب فلوس من البنك فى حياته , طول عمره بيحط فلوس بس , المهم بعد ماسحب الفلوس طلع وراح على أقرب محل دهب , واشترى عقد وغويشتين لمراته , لانه عمره ماجابلها دهب , حتى الشبكة بتاعتها كانت فالصو بس هى ماتعرفش , المهم حنفى خد الهدية وروح على البيت , ومارضيش يفتح الباب بالمفتاح , لكن أصر انه يخبط عشان مراته هى اللى تفتحله )

الزوجة
كنت فين ياحنفى امبارح , قوللى الحقيقة وماتكذبش , انت اتجوزت عليا؟
حنفى (مبتسما)
سلامو عليكو يا أجمل ست فى الدنيا , طب انا راضى ذمتك فى حد يسيب القمر ده كله ويروح يتجوز واحدة تانية
الزوجة : حنفى , انت كويس ؟
حنفى
انا عمرى ماكنت كويس أد النهاردة ياحياتى
الزوجة :
أجمل ست , قمر , وسلامو عليكو أول مادخلت , حنفى أتصل بالدكتور أقوله ييجى , انت مسكت سلك كهربا ولا حاجة
حنفى
ياحبيبتى انا كويس والله ماتقلقيش , الموضوع كله ان انا اتغيرت , وانى امبارح اكتشفت ان ربنا مدينى كنز ونعمة منه , بس انا اللى ماكنتش واخد بالى منها , النعمة دى اللى هى انت يا حياتى
الزوجة
ماهو حاجة من الاتنين , يااما انا بحلم يااما انت اتجنيت
حنفى
ياحبيبتى لا ده ولا ده , انتى صاحية وانا كويس , بصى انا هحكيلك على كل حاجة , بس قبل مااحكيلك عايزك تغمضى عينك وماتفتحيهاش الا لما أقولك
( مراة حنفى غمضت عينيها , وحنفى راح فاتح علبة الدهب )
حنفى :
فتحى عينيكى ياروحى
الزوجة
ايه ده يا حنفى , أبوس ايدك فهمنى اللى بيحصل أصل هيغمى عليا حالا , دهب ده يا حنفى ؟
حنفى :
أيوه ياروحى , دى هدية بسيطة منى ليكى عشان تسامحينى على اللى كنت بعمله فيكى وعلى العذاب اللى كنت معيشك فيها , بس والله العظيم ماعدت هخليكى تتضايقى تانى خالص , وهاعمل اللى ربنا يقدرنى عليه عشان أسعدك , وياريت تقبلى اعتذارى , وتعتبرى النهاردة بداية صفحة جديدة بيننا , وتنسى كل اللى عملته فيكى
الزوجة :
حنفى انا حاسة انى هقع من طولى حالا , ممكن تقولى ايه اللى حصل وايه اللى خلاك تعمل كل ده
(حنفى حكى لمراته الحكاية كلها من ساعة ماحط رجله فى الاتوبيس لحد ما خبط على باب الشقة )
حنفى
وهو ده الموضوع كله ياحبيبتى , ويارب تكونى سامحتينى , وعشان تتأكدى انى اتغيرت فعلا مش كلام وبس , هاعمل حاجة ماعملتهاش معاكى من أول ماتجوزنا
(حنفى قام بايس مراته من دماغها , وراح واخدها فى حضنه , راحت مراته مفتوحة فى العياط وهى فى حضنه , لانه فهلا عمره ماحضنها من أول ماتجوزوا )
الزوجة :
الحمد والشكر ليك يارب , انا مش عارفة أقولك ايه ياحنفى , اللحظة دى أسعد لحظة فى حياتى كلها , ربنا يخليك ليا ويارب تفضل كده على طول
حنفى :
ان شاء الله هفضل كده على طول , وعمرى ماهفرط فيكى تانى أبدا , ومن النهاردة فلوس المرتب كله هتبقى معاكى , وانتى اللى هتبقى المسئولة عن ميزانية البيت , وأى فلوس عايزاها ليكى انت خديها براحتك , وان شاء الله هتكونى أسعد زوجة فى الدنيا , وانا كمان هبقى أسعد زوج فى الدنيا
الزوجة :
لا انت مش هتبقى أسعد زوج فى الدنيا
حنفى :
تقصدى ايه ؟
الزوجة
أقصد انك ان شاء الله هتبقى أسعد أب فى الدنيا
حنفى :
يسمع من بقك ربنا , مانت عارفة ان احنا جربنا كل الطرق , بس مافيش أمل ان احنا نخلف , بس ربنا كبير
الزوجة :
أنا حامل يا حنفى فى الشهر التانى
حنفى :
بتقولى ايه ؟ حـ.... حـ.... قوليها تانى كده
الزوجة :
حامل , أنا حامل , الدكتور هو اللى قالى امبارح لما كنت عنده
(
حنفى راح حاضن مراته وانفجر فى العياط وقعد يشكر ربنا ويحمد فضله , ومراته هى كمان انفجرت فى العياط , وحنفى حس ان الخبر ده مكافأة من ربنا له عشان الكلام اللى قاله للاربعة اللى فى السجن وعشان اللى عمله مع عم محمدين , وعشان اللى عمله مع مراته , حنفى راح داخل متوضى وصلى ركعتين شكر لله , ومن يوميها حنفى بقى اكتر انسان محبوب فى المنطقة بتاعته , وبقى عايش حياة سعيدة جدا هو ومراته وولاده التلاتة , وبقى أول واحد الناس بتروحله عشان يحل مشاكلهم , وحنفى دلوقتى بقى رمز الخير فى المنطقه , وبقى أفضل مثال على ان الانسان الخدوم المحترم هو اللى بيتحب من الناس , وهو اللى ربنا بيرضى عليه , وان الرخامة وحرق دم الناس مابتحرقش غير دم صاحبها , وبتخليه شخص مكروه من الناس كلها , ربنا يرضى علينا كلنا اللهم آمين )


ودى كانت النهاية

_________________
الرجوع الى أعلى الصفحة اذهب الى الأسفل
elbetnona
مشرف أداري
مشرف أداري
avatar

عدد الرسائل : 2260
تاريخ التسجيل : 05/11/2008

بطاقتي الشخصية
المدينه:
حكمه أعمل بها:

مُساهمةموضوع: رد: يوميات المواطن حنفي   الخميس 5 فبراير 2009 - 20:23

كنت عاوزة اعمل زى هنية فى مسلسل العطار ياسلام مييييييسش ياسلام ميسش ياسلام
هههههههههههههههههه

_________________
انا قطة المنتدى واللى يضايقنى هخربشو نياااااااااااااااو
الرجوع الى أعلى الصفحة اذهب الى الأسفل
 
يوميات المواطن حنفي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات رامي و أصدقاء جوستن تي في :: منتديات رامي :: القسم العام :: المنتدي الترفيهي-
انتقل الى: